మిమ్మల్ని మీరు ఉన్నతంగా నిర్వచించుకోండి

                                                                   స్వయం నిర్వచనం అంటే:

ఈ ప్రపంచంలో జరుగుతున్న గొప్ప అద్భుతాలను గుర్తించగలిగే మనస్తత్వం మనకు ఉండాలిగానీ సృష్టిలో ఎన్నో అద్భుతాలు ప్రతిక్షణం జరుగుతూనే ఉంటాయి. అలాగే మీరు కోరుకున్న ఫలితాలు సాధించగలరని నమ్మాలి. మిమ్మల్ని ప్రత్యేకమైన వ్యక్తిగా నిలిపే 20 అంశాలను, మీరు సాధించిన 20 వ్యక్తిగత విజయాలను మీ పర్సనల్ నోట్ బుక్ లో రాయండి. ఆ లిస్టు ఒకసారి చదవండి. అవన్నీ సాధించడానికి ముందు కూడా మీరు వాటిని సాధిస్తానా లేదా అని అనేక అనుమానాలతో అలోచించి ఉంటారు, వాటిని సాధించిన తర్వాత మీపై మీకు నమ్మకం పెరిగి ఉండవచ్చు, ఓహ్ ఇంతేనా ఇది చాలా తేలికైన అంశం అనుకోని ఉండొచ్చు, ఆ అంశాల సాధ్యాసాధ్యాలపై మీరు కొత్త నమ్మకాలను ఏర్పరుచుకొని ఉండవచ్చు. మీ జీవితంలో అద్భుతాలు జరగాలంటే మిమ్మల్ని మీరు అద్భుతమైన వ్యక్తిగా నిర్వచించుకోగలగాలి. అందుకు కావలసిన మానసిక ప్రక్రియే “స్వయంనిర్వచనం” (సెల్ఫ్ డెఫినిషన్). మిమ్మల్ని మీరు ఎలా నిర్వచించుకుంటున్నారు? మిమ్మల్ని మీరు ఎలా ఐడెంటిఫై చేసుకుంటున్నారు? బయటి ప్రపంచంతోను, మీతో మీరు ఎలా ఉంటున్నారు? మీ గురించి మీరు ఎటువంటి వ్యక్తిగా మాట్లాడుతున్నారు? ఈ అంశాలను గమనిస్తే తెలిసేదే  “స్వయంనిర్వచనం”(సెల్ఫ్ డెఫినిషన్). మీ సాధ్యాసాధ్యాలు అనేవి మీకు మీరు ఇచ్చుకునే  నిర్వచనానికి సమానంగా ఉంటాయి. ఇప్పుడు చెప్పండి మిమ్మల్ని మీరు ఎలా నిర్వచించుకుంటున్నారు? మీ స్వయం నిర్వచనం ఏమిటి?

మీ స్వయంనిర్వచనమే  మీ జీవితం:

స్వయంనిర్వచనం అనేది చిన్నప్పుడు పెట్టుకున్న రంగుల కళ్ళజోడుతో సమానం. మీకు పండుగలోనో, యాత్రలలోనో, మీ ఊరి దగ్గరలో జరిగే జాతరలోనో కొనుక్కున్న రంగుల కళ్ళజోడు గుర్తుందా? అది ఏ రంగు అద్దాలుతో తయారు చేస్తే మీకు ప్రపంచం మొత్తం ఆ రంగులో కనపడుతుంది. మీ అక్క , చెల్లెలు, అమ్మ, నాన్న, ఇల్లు, వాకిలి, వస్తువులు, ఊరు, ప్రపంచం మొత్తం అదే రంగు. అలాగే మీ స్వయం నిర్వచనం , మీ సాధ్యాసాధ్యాలపై , మీ శక్తి పై మీ నిర్వచనం రంగు అద్దాల కల్లజోడులా పనిచేస్తుంది. మీరు ఒక చిన్న జాబు చూసుకొని బతుకుదాం అనుకుంటే “అదే నా స్థాయి” అని నిర్వచించుకుంటే ఆ క్షణం నుంచి మీ కల, మీ లక్ష్యం  జాబు సంపాదించడమే  అవుతుంది. మీ స్థాయి ఒక మంచి కంపెనీ లో మేనేజర్ గా నిర్వచించుకుంటే మీరు ఆ దిశలో జీవితాన్ని ఎలా తీర్చిదిద్దుకోవాలా అని ఆలోచిస్తుంది. మిమ్మల్ని మీరు ఒక కంపెనీకి ఓనర్ గా నిర్వచించుకుంటే మీ మెదడు వెంటనే నూతన సంస్థ స్థాపించటం ఎలా , అందుకు మన దేశంలో ఉన్న పద్దతులు ఏమిటి? అటువంటి సంస్థ పెట్టాలంటే ఎటువంటి అనుభవం కావాలి అందుకు నేనేం చేయాలి అని ఆలోచిస్తుంది. అంటే మీరు ఏ స్థితిలో ఉన్న , ఉన్నత స్వయంనిర్వచనం కలిగి ఉంటే మీ నిర్వచనానికి తగినట్లు మిమ్మల్ని నడిపిస్తుంది మీ మెదడు. మీ నిర్వచనానికి తగిన ఛాయస్ లు, నిర్ణయాలు, అవకాశాలు మీరు అందిపుచ్చు కుంటారు. అంటే మీరు ఏ స్థాయిలో, ఎటువంటి వాతావరణంలో ఉన్నారన్నదానికంటే, మీరు పుట్టి పెరిగిన పరిస్తితులకంటే మిమ్మల్ని మీరు ఎలా నిర్వచించుకుంటున్నారు అనేది మీ జీవితాన్ని ఎక్కువ ప్రభావితం చేస్తుందన్నమాట. అంటే మీ బాహ్య ప్రపంచం కంటే అంతర్ ప్రపంచం మిమ్మల్ని ఎక్కువ నిర్మిస్తుంది. మీ అంతర్ ప్రపంచాన్ని బట్టి బాహ్య ప్రపంచంలో అంశాలు ఆవిష్కృతమౌతాయి.

మీ స్వయంనిర్వచనం ఎలా ఏర్పడింది:

• మీ తల్లిదండ్రులు, మీ స్నేహితులు, మీ కేర్ తకెర్స్, టీచర్స్ , మీరు ఇప్పటివరకు కలిసిన మనుషులు
• మీరు చదివిన పుస్తకాలు, మీరు చూసే సినిమాలు, మీరు హాజరైన సమావేశాలు, మీరు చదివే పుస్తకాలు, మీరు చూసే ప్రోగ్రామ్స్
• మీ జీవితంలోని అనుభవాల్లోంచి మీరు సృష్టించుకున్న అర్థాలు, మీ నిర్వచనాన్ని ప్రభావితం చేసే అనేక అంశాలపై మీకు గల నమ్మకాలు

ఈ పై అంశాలన్నీ మీ స్వయం నిర్వచనాన్ని ప్రభావితం చేస్తాయి. అందుకే నిర్దాక్షిణంగా మీగురించి, మీ శక్తి సామర్థ్యాల గురించి, మీరు అందుకోగల అద్భుతాల గురించి, మీరు సృష్టించగల అర్థవంతమైన జీవితం గురించి, మీరు మాత్రమే ఈ ప్రపంచానికి అందించగల ప్రత్యేకమైన అంశం (అది మీ జీవిత కార్యం అయి ఉండొచ్చు!) గురించి మీ మనసులో రూపుదిద్దుకున్న నిర్వచనాలు పరిశీలించుకోండి, ఉన్నత నిర్వచనాలు అన్వేషించండి. మీ గురించి మీరు ఏమని చెప్పుకోడానికి ఆనందిస్తారు? ఏ విధమైన వ్యక్తిగా గుర్తించబడటానికి ఇష్టపడతారు?ఆలోచించండి. మీ ప్రస్తుత జీవిత పరిస్థితులు, మీ పై ప్రపంచం యొక్క ప్రభావం, మీ అనుభవాల వలన ఏర్పడిన అనవసర చట్రాల ప్రభావం వదిలేసి కాలాతీతంగా, మీ జీవిత కాలం తర్వాత కూడా మీరు ఎలాంటి వ్యక్తిగా గుర్తింపబడాలని ఆశిస్తున్నారు? నిర్మాణాత్మక జీవితం నిర్మాణాత్మక ఆలోచనల ద్వారా సాధ్యం. అందుకే ఈ మౌలిక ప్రశ్నలకు సమాధానాలు వెతకండి. మిమ్మల్ని మీరు ఈ క్రింది అంశాలను దృష్టిలో ఉంచుకొని ఉన్నతంగా నిర్వచించుకోండి.

• ఈ ప్రపంచంలో మీరు మాత్రమే చేయగల అత్యున్నత కార్యక్రమాలు నిర్వర్తించడానికి మీరు జన్మించారు
• ఎక్స్ లెన్స్ మీ జన్మ హక్కు . దానిని క్లెయిమ్ చేసుకోండి.
• మీ జీవితంలో ప్రతి చిన్న అంశం , మీరు వాడే ప్రతి వస్తువు, మీరు కలిసే వ్యక్తులు, మీరు చేసే పనులు గుణాత్మకంగా (క్వాలిటీ తో ) కూడినదేనా, మీరు అత్యున్నతమైన వాటినే మీ జీవితంలోకి ఆహ్వానిస్తున్నారా ?అలోచించుకోండి.
• మీ జీవితానికి అత్యంత ప్రాధాన్యమైన అంశాలు ఫై మీ సమయాన్ని, శక్తిని  కేంద్రీకరిస్తున్నారా?
• ఈ క్షణంలోనే మిమ్మల్ని మీరు ఒక అత్యున్నత వ్యక్తిలా మార్చగలిగే మీ స్వయం నిర్వచనం ఏమిటి? 

ఈ క్రింది ఎక్సర్ సైజు లు చేయండి. మీ గురించి మీరు ఉన్నతంగా మీరే నిర్వచించుకోండి.

1. మీ గురించి మీకు కలిగిన ఐదు నెగటివ్ నిర్వచనాలు లేదా మిమ్మల్ని తక్కువ స్తాయిలో ఉంచి ఎదగకుండా ఉంచే మీ స్వయంనిర్వచనాలను పరిశీలించుకోండి. వాటి స్థానంలో ఉన్నత, నూతన  నిర్వచనాలు ఇచ్చుకోండి.

మీ ప్రతిబంధక నిర్వచనం	మీ నూతన స్వయంనిర్వచనం
ఉదా: నేను ఇంగ్లీష్ లో మాట్లాడలేను కాబట్టి నేను ఎదో ఒక జాబు చూసుకొని బతికితే చాలు.	ఉదా: ఇంగ్లీష్ భాష ప్రపంచంలో ఎందఱో మాట్లడుతునంరు. వారిలాగా నేను కూడా మాట్లాడగలను. నేను ఇంగ్లీష్ లో అద్భుతంగా మాట్లాడే కొందరిలో ఒకడిగా పేరు తెచ్చుకుంటాను.

ఇలా ఐదు  కనీసం నిర్వచనాలు రాయండి. ఇంకా ఎక్కువ రాస్తే మీ గురించి మీరు అంత వేగంగా ఉన్నత ఐడెంటిటీ సృష్టించుకోగలరు.

2. నేను ______________వ్యక్తిగా ఎప్పటికి గుర్తుండి పోతాను.

నేను ______________వ్యక్తిగా నిర్మించుకుంటాను.

నేను ప్రతిక్షణం _______________కోసం కట్టుబడి ఉన్న వ్యక్తిగా గుర్తింపబడటం ఇష్ట పడతాను.

నా శక్తిని , నా సమయాన్ని నాకు అత్యంత ప్రాదాన్యాలైన ___________అంశాలపై కేంద్రీకరిస్తాను.

ఈ పై వాక్యాలలో మీరు ఎన్ని విధాలుగా మిమ్మల్ని మీరు నిర్వచించుకుంటారో ప్రతి వాక్యాని పూర్తిగా రాసుకొని రోజు ఒక సారి చదవండి.

౩. స్వయం నిర్వచనాలు పట్టుకోండి: ఈ రోజు నుంచి మూడు వారాలు మీ మనసులో వచ్చే ప్రతి స్వయం నిర్వచనా వాక్యానికి (స్వయం సంభాషణ  లేదా అంతర్వాణి లో) మిమ్మల్ని ఎదగనీయకుండా ఎదురయ్యే వాక్యాలను పరిశీలించుకొని వెంటనే మిమ్మల్ని ఉనతంగా నిర్వచించుకోండి. మీ ప్యాకెట్ లో ఒక చిన్న నోట్ బుక్ పెట్టుకుని మీ నిర్వచనాలను, కొత్తగా ఇచ్చుకున్న ఉన్నత నిర్వచనాలను రాసుకోండి. అయితే ప్రతి నిర్వచనాన్ని ఉన్నతంగా మార్చుకోవటం ఈ ఆటలోని ముఖ్యాంశం. మూడు వారాలలో అద్భుతాలు చూస్తారు. ఆలోచనలలో మార్పు, వ్యక్తిత్వంలో నిర్మాణాత్మక సర్దుబాటు గమనిస్తారు.

4. మిమ్మల్ని మీరు నిర్వచిన్చినట్లుగా , మీ మనసులూని మీ అర్థాన్ని , మీ జీవితాన్ని ప్రతిబింబించేలా ఉన్న బొమ్మలను మీ నోట్  బుక్ లో లేదా జర్నల్ లో  అంటించండి. ఆ బొమ్మలు మీ సబ్ కాన్షియస్ మైండ్ ని ప్రోగ్రాం చేస్తాయి. 

*************

"జీవన వికాసం " మాస పత్రికలో  నేను రాస్తున్న  విశిష్ట జీవనం  కాలమ్ లో ఫిబ్రవరి  2014 కోసం  ప్రచురింపబడిన ఆర్టికల్ 

మీ అరచేతిలో అల్లావుద్దీన్ దీపం - ఆ ఒక్క అలవాటు మీ జీవితాన్ని అద్భుతం చేస్తుంది

మీ అరచేతిలో అల్లావుద్దీన్ దీపం - ఆ ఒక్క అలవాటు మీ జీవితాన్ని అద్భుతం చేస్తుంది

చిన్నప్పుడు ఎండాకాలం వచ్చిందంటే చాలా సమయం ఖాళీగా ఉండేది. ఇల్లు, అమ్మ, నాన్న, పిన్ని , బాబాయ్, పెద్దమ్మ పెదనాన్న, అత్తమ్మ, మామయ్యా, తాతయ్య, అమ్మమ్మ,అక్కలు చెల్లెళ్ళు, అన్నలు, తమ్ముళ్ళు,  ఫ్రెండ్స్, ఆటలు, ఐస్ క్రీం లు, కొబ్బరినీళ్ళు, మామిడి కాయలు, జ్యూస్ లు, పెళ్ళిళ్ళు, టూర్ లు, సమ్మర్ క్యాంపు లు, అబ్బా..భలే వుంటుంది కదూ! వీటితో పాటు మనం అనేక కథలు చదివే వాళ్ళం, పెద్దవాళ్ళు , స్నేహితులు కథలు చెబుతుంటే వినేవాళ్ళం, నేర్చుకునే వాళ్ళం. ప్రతి కథకి ఒక మెయిన్ క్యారెక్టర్ ఉంటారు. కథ అనేక మలుపులతో నడుస్తుంది. ఆ చందమామ కథల్లో అల్లాఉద్దీన్ అద్భుతదీపం ఉంటుంది. అందులోనుంచి ఒక పెద్ద శక్తి రూపం బయటికి వచ్చి ఏమి కోరుకుంటే ఆ వరాలు ఇస్తుంది. అటువంటి ఒక అద్భుతం మీ జీవితంలో జరిగితే మీరు ఆ కోరికలు తీర్చే అదృశ్య శక్తిని ఏమి కోరుకుంటారు?   

• మంచి ర్యాంక్ రావాలి
• పేరున్న కాలేజి లో సీటు రావాలి
• ఎక్కువ డబ్బు సంపాదించాలి
• బహుళజాతి సంస్థలో ఉద్యోగం సంపాదించాలి
• పిల్లలమంచి సంబoధం ఇచ్చి పెళ్ళిళ్ళు చెయ్యాలి
• వ్యాపారం లాభాల్లో నడవాలి,
• బిజినెస్ ఇతర ప్రాంతాలకు , దేశాలకు విస్తరించాలి 
• ఉద్యోగంలో ప్రమోషన్ రావాలి
• చక్కని కాలనీలో ఇల్లు కట్టుకోవాలి
• పెద్ద కార్ కొనుక్కోవాలి
• కుటుంబంతో ఆనందంగా ఉండాలి

.......ఇలా మీరు ఏదో  ఫలితాన్ని సృష్టించాలనుకుంటున్నారు? అవునా? మరి ఆ అదృశ్య శక్తి ఎప్పుడన్నా మీ ఎదుట పడిందా? మీరు ఏం కావాలో ఆ శక్తిని అడిగారా?

మీరు ఆశించింది సాధిస్తే మీరు ఎలా ఉంటారు?

మీ జీవిత కథలో మెయిన్ క్యారెక్టర్ మీరే. మీ సినిమాలో హీరో / హీరోయిన్ మీరే. మీ జీవితంలో జరిగే అనేక సంఘటనలు, మీరు ఇప్పుడున్న స్థితులు , మీ జీవితంలోని వ్యక్తులు, మీ ప్రపంచం .....ఈ సృష్టి అంతా కలిసి ఒక అల్లావుద్దీన్ దీపం లాంటి ప్రక్రియ. మీరు ఏమి కోరుకుంటారో జీవితం దానినే సృష్టిస్తుంది. ఒక్క సారి అలోచించండి ఈ క్షణంలో మీరు ఏమి కోరుకుంటున్నారు? ఏమి సృష్టించాలని ఆలోచిస్తున్నారు? మీ ప్రయత్నాలవలన ఆశించింది సాధిస్తే మీరు ఎలా ఫీల్ అవుతారు? అప్పుడు ఎక్కడ ఉంటారు? మీతో ఎవరు ఉంటారు? మీరు ఎలా కనిపిస్తారు? మీతో మీరు ఏం మాట్లాడుకుంటారు? ఇతరులతో ఎలా మాట్లాడతారు? మీ ఫీలింగ్స్ ఏమిటి?....అబ్బc భలే ఉంది...జరిగితే బాగుండు అనిపిస్తుంది కదూ?

ఎక్సర్ సైజ్:  మీ అద్భుత జీవితం మీచేతులలో

                                 ఎడమచేయి                                    కుడి చేయి 

ఈ పై బొమ్మలో రెండు చేతులు ప్రతిమలు ఇవ్వబడ్డాయి. వీటితో ఈ క్రింది ఎక్సర్ సైజ్ ఈ క్షణమే చేయండి. మీ చేతి ప్రతిమలను మీ జర్నల్ లేదా పర్సనల్ డైరీ లో గీసుకుని కూడా ఈ ఎక్సర్ సైజ్ చేయవచ్చు.  

స్టెప్ 1: కుడి చేతి ప్రతిమలో, మీ సాధించాలనుకుంటున్న మీ లక్ష్యాలు, నేరవేర్చుకోవాలనుకుంటున్న మీ కలలు ఒక్కొక్క వేలిలో ఒక్కొక్కటి రాయండి. ఐదు కంటే ఎక్కువ అంశాలు రాయవలసి వస్తే అరిచేతి భాగంలో రాయండి.

స్టెప్ 2:  ఇప్పుడు ఎడమ చేతి ప్రతిమలో ప్రతిరోజూ మీ 24 గంటల సమయంలో మీ శక్తిని , సమయాన్ని  ఎక్కువగా ఉపయోగిస్తున్న అంశాలు ఒక్కొక్క వేలిలో ఒక్కొక్కటి రాయండి. ఇంకా ఎక్కువ అంశాలు రాయవలసి వస్తే అరిచేతి భాగంలో రాయండి.

స్టెప్ 3:  ఇప్పుడు ఎడమ చేతి ప్రతిమలోని ఏ అంశాల ద్వారా కుడి చేతి ప్రతిమలోని ఏ అంశాలు సాధిస్తారో గుర్తిస్తూ బాణం గీతల ద్వారా జతపరచండి.

స్టెప్ 4: పై మూడు స్టెప్ లు చేయడం ద్వారా మీరు గుర్తించిన అంశాలు, మీ ప్రయత్నాల విధానాలు, మీ నిబద్దత పై మీకు కలిగిన అంశాలు మీ డైరీ లో వ్రాసుకోండి. ఈ ఎక్సర్ సైజ్ ద్వారా నేర్చుకున్న అంశాలు దృష్టిలో ఉంచుకుని ఈ నెల నుంచే మీ శక్తిని, సమయాన్ని ఉన్నత ప్రాధాన్యాలపై ఫోకస్ చేయండి.       

జింక బ్రతకాలంటే పులికి  చిక్కకుండా పరిగెత్తాలి. పులికి  ఆహారం కావాలంటే జింక కంటే వేగంగా పరిగెత్తగలగాలి. అయితే పులి ఎంత వేగంగా పరిగెత్తినా జింక కి వ్యతిరేక దిశలో వెళితే ఏం ప్రయోజనం. మీరు ఆశించిన జీవితం సృష్టించాలంటే మీరు చేసే ఆలోచనలు, ఆచరణ, ప్రయత్నాలు అందుకు అనుసంధానంగా ఉండాలి. మీ లక్ష్యాలు ఒక మార్గంలో ఉన్నప్పుడు మీ ఫోకస్, మీ ఎనర్జీ ఆ లక్ష్యాల దిశలో ఉండాలి. లేకపోతే లక్ష్యాలు కేవలం  కోరికలగా ఉండిపోతాయి. ఒక సారి ఆలోచించండి. ఇప్పుడు మీరు ఆలోచిస్తున్న  ఆలోచనలు, మీరు ప్రయత్నం చేస్తున్న పద్దతులు, మీ నమ్మకాలు, మీ దృక్పథం  రాబోయే ఐదు సంవత్సరాలలో లేదా రెండు సంవత్సరాలలో మీకు ఎలాంటి ఫలితాలని ఇస్తాయి? ఆ ఐదు లేదా రెండుసంవత్సరాలలో మీరు ఏ స్థితిలో ఉంటారు? మీరు ఎలా ఫీల్ అవుతారు? మీరు ఆశించింది సృష్టించాలంటే మీ జీవన ప్రాధాన్యాలపై దృష్టి పెట్టి పనిచేస్తున్నారా ? గమనించండి.

మీ జీవిత ప్రాధాన్యాలే మీ  అలవాటుగా మార్చుకోండి:

• మీరు ఎప్పుడు దేనిగురించి ఆలోచిస్తారో, దేనిగురించి కృతజ్ఞతగా ఉంటారో దానిని సృష్టిస్తారు. What you think about, what you feel thank about will be what you bring about in your life. మీ ఆలోచనలలో ఎక్కువగా మీరు ఆశించిన విషయాలు ఉండేలా చూసుకోండి. కొందరు అంటారు “ఈ ఉద్యోగం వద్దు ఇంకా మంచిది కావాలనుకుని ఎప్పుడూ అనుకుంటూ ఉన్నానండి కానీ నా ఖర్మ ఏంటో అసలు ఈ కంపెనీ నుంచి బయట పడదామంటే ఆఫర్స్ సరైనవి రావట్లేదండి”. మీరు ప్రస్తుతాన్ని అందులోని ఆనందాన్ని గుర్తించకుండా, ఉన్నదానిని ఆనందంగా స్వీకరించకుండా కొత్తదానిని సాధించినా ఆనందించలేరు. “ఈ కంపెనీ వద్దు”  అనే బదులు “నాకు ఫలానా కంపెనీలో, ఇంత సాలరీతో, ఈ పోసిషన్ లో ఉద్యోగం కావాలి” అని ఆశించిన దానిని పాజిటివ్ పదాలతో మాట్లాడడం అలవాటు చేసుకోండి. ఎందుకంటే మీరు “వద్దు.. వద్దు..” అంటే , వద్దు అనే  స్థితినే సృష్టించుకుంటారు.  

• ఒక నెల... ఒక సంవత్సరం... ఒక జీవితం:  మన జీవితంలో ఏ ఒక్క రోజుని , ఏ ఒక్క క్షన్నాన్ని రెండూ సారి బ్రతకలేం. ఇది ఒక జీవితం. అందుకే మీ జీవిత లక్ష్యం, వచ్చే ఐదు సంవత్సరాల లక్ష్యాలు, మీ ఒక సంవత్సరం లక్ష్యాలు ఏమిటో నిర్ణయించుకోండి. ప్రతి సంవత్సరం ఎదో ఒక నెలలో మీ వన్ ఇయర్ గోల్స్ పెట్టుకుని జీవితాన్ని స్పష్టంగా పునః పరిశీలించుకొండి. మీ గత సంవత్సర లక్ష్యాలు సాధించడానికి ఎలా ప్రయత్నించారు, ఏమి నేర్చుకున్నారు, ఎవరెవరికి కృతజ్ఞతలు తెలుపుకుంటున్నారు, రాబోయే సంవత్సరంలో ఏమి చేయాలనుకుంటున్నారు అన్నీ పరిశీలించుకోండి. సంవత్సరం లక్ష్యాలు నెలల వారిగా మార్చుకొని, నెల వారి లక్ష్యాలు చేరేందుకు మీ రోజువారీ ప్రణాళికలతో ముందుకు వెళ్ళండి.
• రాయటం అంటే  నిర్మాణాత్మకంగా అలోచించడమే: అందుకే జర్నల్ లేదా డైరీ రాయండి. మీ జీవితంలో జరిగే ముఖ్య అంశాలను , మీ లక్ష్యాలను రాసుకోడానికి, మీ ఎదుగుదలను మీరే మానిటర్ చేసుకోడానికి, మీ ఆలోచనలలో స్పష్టత రావడానికి, ప్రతినెల రివ్యూ చేసుకోడానికి, ప్రతిరోజు గోల్స్ చదువుకోడం ద్వారా అర్ధవంతంగా ప్రణాళిక, ప్రోత్సాహం చేసుకోడానికి  అద్భుతమైన ప్రక్రియ జర్నల్ రాయడం. జర్నల్ లేదా పర్సనల్ డైరీ రాయండి.
• ఏది చూస్తారో, ఏది భావిస్తారో అది జరుగుతుంది: మీ జీవన ప్రాధాన్యాల దిశగా సంవత్సరం లక్ష్యాలు (ఇయర్ గోల్స్) సాధించినట్లుగా అప్పుడు ఎలా ఉంటారో అలా ఫీల్ అవ్వండి, అప్పుడు ఎవరితో ఉంటారు, ఏం మాట్లాడతారు, ఎలా ఫీల్ అవుతారు. అలా ఈరోజు నుంచే ఫీల్ అవుతూ ఉండండి. ఒకే రకమైన భావాలు ఆకర్షించ బడతాయి. మీరు ఆనందాన్ని, సాధించాను అనే భావాలని రోజు ఫీల్ అయితే ఆనందం, సాధించడం నిజంగానే ఆకర్షిస్తారు.

మీ జీవితం ప్రాధాన్యాలు మీ అలవాటుగా చేసే పనులలో భాగం అవ్వాలి. 90% మీ ఆలోచనలు , పనులను నియంత్రించేది మీ సబ్ కాన్షియస్ మైండ్. దానిని సైతం మీరు ప్రోగ్రాం చేయాలనుకుంటే, మీ జీవితానికి రిమోట్ మీ చేతిలో ఉండాలంటే మీ అలవాట్లు మీ జీవిత ప్రాధాన్యాల దిశలో ఉండాలి. అందుకు మీలో మీరు మాట్లాడుకునే మాటలు, మీలో మీరు చూసే చిత్రాలు మీరు ఆశించిన అంశాలకు తగినట్లుగా ఉండాలి. ఈ కీలక అంశాన్ని దృష్టిలో ఉంచుకొని మీ ఆర్టికల్ రాయటం జరిగింది.   ఇంకెందుకు ఆలస్యం ఈ క్షణమే మీకు ఒక పర్సనల్ నోట్ బుక్ కొనుక్కోండి. మీ జీవిత ప్రాధాన్యాలపై పనిచేయటం మీ అలవాటుగా మలుచుకోండి.

**************"సైకాలజీ టుడే" మాస పత్రికలో  మూడు సంవత్సరాలుగా నడపబడుతున్న నా న్యూ లైఫ్ కాలమ్ లో మే 2014 కోసం  ప్రచురింపబడిన ఆర్టికల్